Bim Coiffeur
Mani Matter

---

C Am
1. Bim Coiffeur bin i gsässe vor em Spiegel, luege dry
Dm G7
und gseh dert drinn e Spiegel wo ar Wand isch vis-à-vis
C Am
und dert drenn wider spieglet sech dr Spiegel da vor mir
Dm G7
und i däm Spiegel widerum dr Spiegel hindefür

2. Und so geng wyter: s'isch gsy win e länge Korridor
i däm my Chopf gwüss hundertfach vo hinden und vo vor
isch ufgreit gsy i eir Kolonne, z'hinderscht isch der Chopf
i ha ne nümme gchennt, so chly gsy win e Gufechnopf

3. My Chopf dä het sech dert ir Wyti, stellet öich das vor
verloren ir Unäntlechkeit vom länge Korridor
I ha mi sälber hinde gseh verschwinde, ha das gseh
am heiterhälle Vormittag und wi we nüt wär gscheh

4. Vor Chlupf han i mys Muul ufgsperrt, da sy im Korridor
grad hundert Müler mit ufggange win e Männerchor
e Männerchor us mir alei, es cheibe gspässigs Gfüel
es metaphysischs Grusle het mi packt im Coiffeurgstüel

5. I ha d Serviette vo mer grissen, ungschore sofort
das Coiffeurgschäft verla mit paar entschuldigende Wort
und wenn dir findet i sött e chly meh zum Coiffeur ga
de chöit dir jitz verstah warum i da e Hemmig ha

---